Gwamnan jihar Imo, Hope Uzodimma, ya ce gwamnonin jam’iyyar APC na alfahari da abin da Shugaba Bola Ahmed Tinubu ya cim ma tun bayan hawansa mulki a shekarar 2023, tare da jaddada aniyarsu ta tabbatar da nasarar sake zaɓensa a babban zaɓen 2027.
Gidan talabijin na Channels ya ruwaito cewa Uzodimma ya bayyana hakan ne a ranar Laraba a Abuja, yayin ƙaddamar da babban kwamitin yaƙin neman zaɓen shugaban ƙasa na APC.
Uzodimma, wanda shi ne shugaban ƙungiyar gwamnonin APC kuma sakataren kwamitin yaƙin neman zaɓen shugaban ƙasa na jam’iyyar, ya ce tabbatar da sake zaɓen Tinubu nauyi ne da ya rataya a wuyan dukkan mambobin jam’iyyar.
Ya bayyana cewa nasarar jam’iyyar za ta dogara ne da haɗin kai da kuma yadda shugabanninta da sauran mambobinta za su yi aiki tare domin cim ma burinsu.
Gwamnan ya buƙaci mambobin APC da su sasanta duk wani saɓani da ke tsakaninsu, domin su iya magana da murya ɗaya wajen neman goyon bayan masu zaɓe.
A cewarsa, bai kamata bambance-bambancen cikin gida su kawo cikas ga ƙoƙarin jam’iyyar na neman sake zaɓen shugaban ƙasa ba.
Uzodimma ya kuma buƙaci mambobin jam’iyyar da su ɗauki kowace rana kafin babban zaɓen 2027 a matsayin ranar aiki, maimakon jiran lokacin yaƙin neman zaɓe ya yi kusa.
Ya jaddada cewa wajibi ne kowane mamba ya mayar da hankali wajen tabbatar da goyon bayan jam’iyyar a mazabarsa da kuma rumfunan zaɓen da ke ƙarƙashin kulawarsa.
Gwamnan ya ce wannan tsari zai taimaka wajen ƙarfafa haɗin kai da kuma inganta shirye-shiryen APC gabanin zaɓen shugaban ƙasa mai zuwa.
Ya sake nanata cewa gwamnonin jam’iyyar 31 sun ƙuduri aniyar mara wa Tinubu baya domin neman wa’adi na biyu a shekarar 2027.
Jawabin Uzodimma ya zo ne yayin da APC ke ƙara shirye-shiryen yaƙin neman zaɓen shugaban ƙasa, tare da ƙoƙarin haɗa kan mambobinta da tattara goyon bayan masu zaɓe a faɗin Nijeriya.
