Sheikh Ibrahim bin Adel Hamza Al-Madani, ɗaya daga cikin ladanan babban masallacin Harami da ke birnin Makkah (Masjid Al-Haram), ya riga mu gidan gaskiya.
Jaridar Punch ta ruwaito cewa an sanar da rasuwarsa ne da sanyin safiyar ranar Litinin ta shafin dandalin X na ‘Inside the Haramain’, wanda ke kawo labaran masallatai biyu masu alfarma.
Sanarwar ta bayyana cewa kiran sallarsa na ƙarshe a Masallacin Harami shi ne wanda ya yi a ranar Litinin, 11 ga watan Rabi’ul Awwal, 1448 bayan hijira.
Shafin ya wallafa cewa, “Cikin alhini muke sanar da labarin rasuwar ladanin Masjid Al-Haram, Sheikh Ibrahim Al-Madani. Kiran sallar ƙarshe da Sheikh Ibrahim Al-Madani ya yi a Masallacin Harami shi ne na ranar 11 ga watan Rabi’ul Awwal, 1448.”
Za a gudanar da sallar jana’izar marigayin bayan idar da sallar la’asar ta ranar Litinin a Masallacin Harami, kafin daga bisani a binne shi a maƙabartar Al-Mu’alla da ke birnin Makkah.
An haifi Sheikh Ibrahim Al-Madani ne a birnin Madina a shekarar 1397 bayan hijira (1976 Miladiyya). Ya tashi a cikin gidan addini, inda kakan mahaifinsa wanda mahaddacin Alƙur’ani ne ya yi tasiri a kansa tun yana ƙarami.
Yana ɗan shekara 15 ya fara kiran salla a wani masallaci da ke unguwarsu a Madina tare da wasu maƙwabtansu guda uku har zuwa lokacin da ya kammala karatu a kwaleji. Daga baya ya ɗan dakata na wani lokaci sakamakon aikin koyarwa a wajen birnin na Madina.
A shekarar 1428 bayan hijira (2007–2008), ya koma kiran salla a masallacin Masjid Al-Maddah, inda ya ci gaba da aiki har zuwa lokacin da aka naɗa shi a matsayin ladanin Masallacin Harami na Makkah a hukumance a shekarar 1439 bayan hijira (2017–2018).
Sheikh Al-Madani ya samu shaidar karatu a fannin karatun Alƙur’ani (Qur’anic Studies), kuma ya haɗa salo biyu na kiran salla; salon birnin Madina da kuma na birnin Makkah wanda ya koya a wajen Sheikh Abdul Latif Mulla, tsohon ladanin Masallacin Harami kuma aminin kakansa.
