Shugaban hukumar ƙwallon ƙafa ta duniya wato FIFA, Gianni Infantino, ya tabbatar da cewa ƙasar Iran za ta halarci gasar cin kofin duniya ta 2026 duk da rikice-rikicen siyasa da na yaƙi da ke faruwa a yankin Gabas ta Tsakiya.
Wannan sanarwa ta kawo ƙarshen shakku da rashin tabbas da suka taso kan ko Iran za ta samu damar shiga gasar ko akasin haka.
Infantino ya bayyana cewa Iran “lallai za ta zo” gasar, yana mai jaddada cewa ƙasar ta riga ta cancanta ta hanyar fafatawa, kuma ‘yan wasan ƙasar suna da sha’awar halarta.
Ya kuma nuna fatan cewa kafin lokacin gasar, za a samu zaman lafiya wanda zai sauƙaƙa halartar tawagar kasar cikin kwanciyar hankali.
Wannan batu ya taso ne sakamakon rikicin da ke tsakanin Iran da wasu ƙasashe, musamman rikicin da ya shafi Amurka da abokan hulɗarta, wanda ya sa aka fara nuna damuwa kan yiwuwar Iran ba za ta halarci gasar ba.
A wasu lokuta, jami’an Iran sun nuna cewa akwai yiwuwar ƙasar ba za ta je ba saboda matsalolin tsaro da siyasa.
Haka kuma, an ruwaito cewa Iran ta taba neman a sauya wuraren wasanninta daga Amurka zuwa Mexico saboda dalilan tsaro, amma hukumar FIFA ta ƙi amincewa da wannan bukata, tana mai cewa jadawalin gasar zai ci gaba kamar yadda aka tsara tun farko.
Infantino ya jaddada cewa bai kamata ƙwallon ƙafa ta zama abin da siyasa ke hana gudana ba, yana mai cewa wasa na da rawar da zai taka wajen haɗa kan al’umma da gina zaman lafiya.
Ya ce FIFA za ta ci gaba da tabbatar da cewa dukkan ƙasashen da suka cancanta sun samu damar halartar gasar ba tare da tangarda ba.
Iran ta riga ta tabbatar da gurbi a gasar tun shekarar 2025, wanda hakan zai ba ta damar halartar gasar karo na bakwai a tarihinta, duk da cewa har yanzu ba ta taɓa tsallake matakin rukuni ba.
