Hukumar zaɓen jihar Bauchi (BASIEC) ta bayyana jam’iyyar APM a matsayin wadda ta lashe zaɓen ƙananan hukumomin jihar da aka gudanar ranar Litinin.
Jaridar Daily Trust ta ruwaito shugabar hukumar, Hajiya Jummai Abubakar, ce ta sanar da sakamakon zaɓen bayan kammala kaɗa ƙuri’a, ƙirge da tattara sakamakon daga rumfunan zaɓe.
A cewar hukumar, ‘yan takarar APM sun lashe dukkan kujerun shugabannin ƙananan hukumomi 20 da aka fafata a jihar.
Haka kuma, APM ta lashe kujerun kansiloli 319 daga cikin kujeru 323 da aka fafata a zaɓen, yayin da sauran jam’iyyun siyasa suka samu kujeru huɗu kacal.
Hukumar ta ce jam’iyyar SDP ta lashe kujerar kansilan mazabar Dandango Ward a ƙaramar hukumar Bauchi, yayin da NRM ta samu nasara a mazabar Darazo South da ke ƙaramar hukumar Darazo.
Haka kuma, jam’iyyar ZLP ta lashe Wandi Ward a ƙaramar hukumar Dass, yayin da YPP ta samu nasara a Zirami Ward na ƙaramar hukumar Giade.
Shugabar hukuma ta BASIEC ta ce hukumar ta ayyana dukkan ‘yan takarar da suka samu nasara a matsayin waɗanda aka zaɓa bisa tanadin dokar zaɓe, bayan sun samu mafi yawan ƙuri’un da aka tabbatar a yankunansu.
Sai dai wasu daga cikin jam’iyyun adawa sun kaurace wa zaɓen, suna zargin cewa gudanar da zaɓen ya saɓa wa wasu tanade-tanaden dokar zaɓen jihar Bauchi ta 2026.
Jam’iyyun da suka kaurace wa zaɓen sun haɗa da ADC, NNPP, AAC, PRP da sauransu.
Sakamakon zaɓen ya bai wa APM gagarumar nasara a matakin ƙananan hukumomi a jihar, yayin da matakin da jam’iyyun adawa suka ɗauka na kaurace wa zaɓen zai iya ci gaba da haifar da muhawara kan sahihancin tsarin zaɓen ƙananan hukumomin jihar.
