Mataimakin Shugaban Nijeriya, Kashim Shettima, ya ce matakan tattalin arzikin da gwamnatin Shugaba Bola Ahmed Tinubu ta ɗauka sun ceci tattalin arzikin ƙasar daga durƙushewa.
Shettima ya ce matakan sun kuma taimaka wajen hana Nijeriya faɗawa cikin wani mawuyacin hali na tattalin arziki.
Jaridar Premium Times ta ruwaito cewa Mataimakin Shugaban Ƙasar ya bayyana hakan ne ranar Asabar, yayin da yake zantawa da manema labarai bayan wata ganawa da Shugaba Bola Ahmed Tinubu a gidansa da ke Ikoyi, jihar Legas.
A cewar Shettima, lokacin da gwamnatin Tinubu ta karɓi ragamar mulki a shekarar 2023, ajiyar kuɗin waje na Nijeriya ta kasance ƙasa da dala biliyan 3.9.
Ya ce wannan adadin bai isa gwamnatin ƙasar ta yi amfani da shi wajen shigo da man fetur na tsawon wata guda ba.
Mataimakin Shugaban Ƙasar ya yi wannan bayani ne yayin da yake kare manufofin tattalin arzikin gwamnatin Tinubu tun bayan da ta karɓi mulki.
Gwamnatin Tinubu ta aiwatar da wasu manyan sauye-sauyen tattalin arziki tun daga shekarar 2023, ciki har da sauya tsarin tallafin man fetur da kuma wasu sauye-sauye a harkar musayar kuɗaɗen waje.
Sai dai waɗannan sauye-sauye sun kasance batun muhawara tsakanin gwamnati da masu suka, musamman kan tasirinsu ga rayuwar ’yan Nijeriya da hauhawar farashin kayayyaki.
Shettima ya dage cewa matakan da gwamnatin ta ɗauka sun kasance wajibi domin tunkarar matsalolin tattalin arzikin da gwamnatin ta gada.
Ya ce halin da ajiyar kuɗin waje yake ciki a lokacin da gwamnatin ta karɓi mulki na daga cikin matsalolin da ke nuna irin ƙalubalen da gwamnatin ta fuskanta a farkon wa’adinta.
