Kamfanin Man Fetur na Nijeriya (NNPC) ya bayyana cewa kuɗaɗen shigarsa sun ragu da kusan kashi 13 cikin 100 a watan Mayun 2026, duk da cewa yawan hako ɗanyen mai da iskar gas bai samu babban sauyi ba.
Rahoton kamfanin ya nuna cewa kuɗaɗen shiga sun ragu daga naira tiriliyan 4.971 a watan Afrilu zuwa naira tiriliyan 4.335 a watan Mayu, yayin da ribar bayan haraji ta sauka daga naira biliyan 481 zuwa biliyan 462.
NNPC ta ce raguwar ta biyo bayan wasu ƙalubalen aiki da kuma yanayin kasuwa, duk da cewa tana ci gaba da samar da ganga miliyan 1.73 na ɗanyen mai a kullum.
Kamfanin ya kuma bayyana cewa samar da iskar gas ya kai ƙafar cubic miliyan 7,774 a kullum, yayin da ingancin bututun jigilar mai ya kai kashi 98 cikin 100.
Rahoton ya ce kamfanin na ƙara ƙaimi wajen magance matsalolin da ke hana ƙaruwa a samar da mai, ciki har da raguwar matsin rijiyoyi, gyaran kayayyaki da matsalolin kayan aiki.
NNPC ta kuma bayyana cewa ta biya gwamnatin tarayya naira tiriliyan 4.858 tsakanin Janairu zuwa Mayun 2026 a matsayin kuɗaɗen doka da ake biya cikin asusun tarayya.
Game da manyan ayyukan iskar gas, kamfanin ya ce aikin bututun iskar gas na Ajaokuta-Kaduna-Kano (AKK) ya kai kashi 94 cikin 100 na kammalawa, kuma ana sa ran zai fara isar da gas zuwa Abuja daga baya a wannan shekara.
Haka kuma, aikin bututun OB3 da ya ratsa Kogin Neja ya kai kashi 97 cikin 100, inda NNPC ta ce ana sa ran kammala aikin gaba ɗaya kafin ƙarshen zango na ukun shekarar 2026.
Kamfanin ya kuma ce ya bai wa Asibitin Koyarwa na Jami’ar Nnamdi Azikiwe da ke Nnewi na’urar MRI ta zamani mai ƙarfin 1.5 Tesla ta hannun gidauniyarsa ta NNPC Foundation domin inganta ayyukan binciken lafiya a yankin Kudu maso Gabas.
NNPC ta jaddada cewa alkaluman da ke cikin rahoton na wucin gadi ne kuma za a sake tantance su, tana mai cewa za ta ci gaba da inganta ayyukanta tare da aiwatar da manyan ayyukan da za su ƙara samar da mai da iskar gas a ƙasar.
