Dakarun rundunar Operation FANSAN YAMMA sun kashe wasu da ake zargin ’yan ta’adda uku tare da ƙwato makamai da alburusai a wani samame da suka kai a Jihar Zamfara.
Rahotanni sun nuna cewa an gudanar da aikin ne da safiyar Alhamis a ƙananan hukumomin Kaura Namoda da Birnin Magaji domin ci gaba da yaƙi da matsalar tsaro a Arewa maso Yammacin Nijeriya.
Mai magana da yawun rundunar, Laftanar Kanal Aliyu Danja, ya ce dakarun sun kai sintiri domin hana ’yan ta’adda samun damar zirga-zirga a yankunan.
Sanarwar ta ce sojojin sun yi arangama da wasu ’yan bindiga a ƙauyen Doumbourum inda aka yi musayar wuta mai tsanani.
A cewarsa, dakarun sun yi nasarar fatattakar maharan bayan amfani da ƙarfi da makamai masu yawa, lamarin da ya sa suka tsere cikin ruɗani bayan sun yi asara mai yawa.
Rahoton ya ce an kashe mutum uku daga cikin waɗanda ake zargi tare da ƙwato bindigar AK-47 guda ɗaya, bindigar mashin guda ɗaya da kuma bindiga ƙirar gida.
Haka kuma jami’an tsaron sun ƙwato harsasai 571 da mujallu bakwai na bindiga daga wurin.
Rundunar ta tabbatar da cewa babu wani soja da ya rasa ransa ko ya jikkata yayin aikin.
Operation FANSAN YAMMA ta ce nasarorin da ake samu na nuna jajircewar jami’an tsaro wajen yaƙar ta’addanci da ayyukan miyagun laifuka a yankin Arewa maso Yamma.
