Makonni biyu bayan da ’yan bindiga suka sace wasu limaman Juma’a a jihar Zamfara, har yanzu ba a san inda suke ba, yayin da iyalansu da al’ummominsu ke ci gaba da jiran labarin makomarsu.
Jaridar Daily Trust ta ruwaito cewa an sace limaman ne a ranar 13 ga Satumba, yayin da suke kan hanyarsu ta zuwa Talata Mafara domin halartar wata addu’a ta musamman da aka shirya domin samun nasarar sake zaɓen Shugaba Bola Ahmed Tinubu a zaɓen 2027.
Rahotanni sun ce ’yan bindigar sun yi wa limaman kwanton ɓauna ne a yankin Gidan Suleiman Bature, da ke kusan kilomita uku daga ƙauyen Damri.
Addu’ar da limaman ke shirin halarta an shirya ta ne ƙarƙashin jagorancin Darakta-Janar na kwamitin yaƙin neman zaɓen Tinubu na 2027, kuma tsohon gwamnan Zamfara, Sanata Abdul’aziz Yari Abubakar.
Sama da limamai 2,000 ne aka ce sun halarci taron.
Daga cikin limaman da aka sace akwai Limamin Masallacin Juma’a na Dakko, Malam Shehu; Limamin Dogon Madacci, Liman Yahuza, tare da mataimakinsa; Limamin Fagon, Liman Bala; da Na’ibi Tasi’u na Tungar Nagodai.
Yawancin limaman sun fito ne daga ƙaramar hukumar Bakura, yayin da Na’ibi Tasi’u ya fito daga ƙaramar hukumar Anka.
Tun bayan faruwar lamarin, rundunar ’yan sandan jihar Zamfara ta ce ta ƙaddamar da aikin bincike da ceto domin ganin an kuɓutar da limaman.
Sai dai wani ɗan limamin da aka sace, wanda ya nemi a sakaya sunansa, ya shaida wa Daily Trust cewa iyalai da al’ummomin da abin ya shafa na cikin mawuyacin hali saboda rashin sanin halin da limaman suke ciki.
Ya ce iyalan na fuskantar wani wa’adi da ake zargin ’yan bindigar sun bayar dangane da biyan kuɗin fansa domin sakin limaman.
Wani ɗan uwan limaman ya kuma bayyana cewa ’yan bindigar sun matsar da su zuwa wani wuri, lamarin da ya ƙara dagula hankalin iyalansu saboda ba su san inda aka kai su ba.
A cewar majiyar, bayan tattaunawa kai tsaye da ’yan bindigar, an samu damar rage kuɗin fansar da suka fara nema daga Naira miliyan 100 zuwa Naira miliyan 30.
Sai dai majiyar ta ce tattaunawar ta kasance cikin yanayi mai wahala, yayin da al’ummomin da abin ya shafa ke ƙoƙarin samo kuɗin fansar da ake nema.
Ta ce wasu daga cikin al’ummomin sun fara tara kuɗi gwargwadon abin da kowa zai iya bayarwa domin ƙoƙarin ceto limaman.
Wata majiya kuma ta yi zargin cewa masu ba ’yan bindigar bayanai na kawo cikas ga ƙoƙarin jami’an tsaro na kai wa wuraren da ake tsare da limaman.
Sai dai waɗannan zarge-zargen ba su da tabbaci daga jami’an tsaro, yayin da ƙoƙarin jin ta bakin wasu jami’an gwamnatin jihar Zamfara kan batun bai yi nasara ba, kamar yadda Daily Trust ta ruwaito.
A halin da ake ciki, majiyar ta ce ayyukan addini a masallatan limaman da aka sace na ci gaba da gudana, inda mataimakansu ko wasu malamai suka karɓi ragamar gudanar da harkokin masallatan.
Lamarin dai ya ƙara jawo hankalin jama’a kan matsalar ’yan bindiga da garkuwa da mutane da ke ci gaba da addabar wasu sassan jihar Zamfara.
An kashe mutum guda yayin harin kasuwar dabbobi a Tsafe a wani labarin da ya shafi tsaro a jihar, mutum guda ya mutu bayan da ’yan bindiga ɗauke da makamai suka kai hari wata kasuwar dabbobi a garin Tsafe ranar Litinin.
Rahoton ya ce maharan sun fara harbe-harbe daga nesa da rana, lamarin da ya sa ’yan kasuwa da masu saye suka tsere domin tsira da rayukansu tare da barin harkokinsu.
Daga bisani jami’an tsaro sun yi artabu da ’yan bindigar, inda maharan suka ja da baya daga yankin.
An ce wannan shi ne karo na biyu da aka kai hari kasuwar cikin kusan watanni biyu.
Harin ya biyo bayan wani hari da aka kai garin Tsafe ranar Lahadi, inda rahotanni suka ce ’yan bindiga sun yi amfani da makamai wajen kai farmaki tare da yin garkuwa da mutane bakwai.
Wani ganau, Muhammad Tanimu, ya shaida cewa kimanin ’yan bindiga 50 ne suka kutsa cikin garin tare da buɗe wuta, kafin jami’an tsaro su mayar da martani bayan maharan sun bar yankin.
Bayan hare-haren, rundunar ’yan sandan jihar Zamfara ta ƙara tura jami’ai zuwa Tsafe domin ƙarfafa tsaro a garin da sauran al’ummomin da ke kewaye da shi.
Rahoton ya ce hare-haren da ake samu a Tsafe a baya-bayan nan sun ƙara jefa manoma da ’yan kasuwa cikin fargaba, musamman saboda dogaro da gonaki da kasuwanni wajen samun abin masarufi da gudanar da sana’o’insu.
